Ajax Loader
Geo

ეროვნული გალერეა

ყურადღება: 10 სექტემბრიდან, ლეონარდო და ვინჩის, მიქელანჯელოს, რაფაელის, ბოტიჩელის, ტიციანის და სხვა დიდი იტალიელი მხატვრების ნამუშევრების შემდეგ საქართველოს ეროვნული მუზეუმი და იტალიის საელჩო საქართველოში წარმოგიდგენთ გამოფენას ბერნინის სკოლა და რომაული ბაროკო.

გამოფენის გახსნა: 10 სექტემბერი, 19:00.

გამოფენის ხანგრძლივობა: 11 სექტემბერი - 25 ნოემბერი, 2018.

გამოფენას თან ახლავს სხვადასხვა ასაკისთვის განკუთვნილი საგანმანათლებლო პროგრამები და საჯარო ლექციები. პირველ საჯარო ლექციას გამართავს მუზეუმის „პალაცო კიჯი ინ არიჩა“ დირექტორი ფრანჩესკო პეტრუჩი.

ბერნინის სკოლა და რომაული ბაროკო

ჯოვან ლორენცო ბერნინი (ნეაპოლი 1598 - რომი 1680) ბაროკოს ხელოვნების დიდ სტრატეგოსად და მის უმაღლეს წარმომადგენლად გვევლინება. ნახევარ საუკუნეზე მეტი ხნის განმავლობაში პაპების მთელი თაობის სამსახურში იყო. ის ცნობილია როგორც მოქანდაკე და არქიტექტორი, თუმცა ამავდროულად იყო ფერმწერი, სცენოგრაფი, მსახიობი და კომედიოგრაფი.
მისი მრავალმხრივი ნიჭის გამოვლინებაა მდიდრული და საუცხოო დეკორაციები, რომელთა მასალის მრავალფეროვნება, ორნამენტული დეტალების სტილი და ექსპრესიულობა სახვითი ხელოვნების ყველა სახეობის სრულყოფილ ერთიანობად გვევლინება.
დიმიტრი შევარდნაძის სახელობის ეროვნულ გალერეაში გამოფენაზე „ბერნინის სკოლა და რომაული ბაროკო“ დამთვალიერებელი გაეცნობა ბერნინისა და XVII საუკუნის სხვა იტალიელი ოსტატების შედევრებს, რომლებიც დაცულია რომის მახლობლად მდებარე რომაული ბაროკოს მუზეუმში „პალაცო კიჯი ინ არიჩა“. გამოფენაზე წარმოდგენილი იქნება 60-მდე მეტი ნამუშევარი. მათ შორის ფერწერული და გრაფიკული პორტრეტები, ავტოპორტრეტები, პეიზაჟები; ბრინჯაოს მედლები და მედალიონი, სასახლის მორთულობები, ტყავისა და აბრეშუმის საკიდები, დეკორატიული ლამპა; საკულტო ნაგებობებისთვის განკუთვნილი დიდი ფრესკების მოსამზადებელი ესკიზები და სხვა.
გამოფენაზე წარმოდგენილი შედევრები სრულყოფილად წარმოაჩენს სახვითი ხელოვნების იმ ჟანრებსა და სტილს, რომლებმაც ბაროკოს ესთეტიკა განსაზღვრა და, იმავდროულად ჩამოაყალიბა კათოლიკური ეკლესიის, როგორც ზნეობრივი, ისე სულიერი საკომუნიკაციო სისტემა. ისტორიული, ალეგორიულ-რელიგიური და მითოლოგიური თემატიკის მომცველი ფერწერის გარდა, აქ წარმოდგენილია სახასიათო ნიმუშები იმ ჟანრებისა, რომელთაც აღნიშნული ეპოქის ქტიტორები ანიჭებდნენ უპირატესობას.
პროექტი იტალიის საელჩოსა და საქართველოს ეროვნული მუზეუმის მჭიდრო თანამშრომლობის შედეგია და ხორციელდება საქართველოს მთავრობის პროექტ Check-in-Georgia-ს ფარგლებში. ინიციატივას მხარს უჭერს: იტალიური მხრიდან - იტალიის საგარეო საქმეთა და საერთაშორისო თანამშრომლობის სამინისტრო და პროგრამა "VivereALL'Italiana". ქართული მხრიდან - განათლების, მეცნიერების, კულტურისა და სპორტის სამინისტრო, ეკონომიკისა და მდგრადი განვითარების სამინისტრო, ტურიზმის ეროვნული ადმინისტრაცია. გამოფენა ხორციელდება Palazzo Chigi-სა და Global Project Consulting-თან კოლაბორაციით. გამოფენების მხარდამჭერები არიან: DBA, Salini Impregilo, ვითიბი ბანკი, Leonardo, Gulf, Anas.


დიმიტრი შევარდნაძის სახელობის ეროვნული გალერეა ერთ-ერთი მთავარი საგამოფენო სივრცეა თანამედროვე ხელოვნების წარმოსადგენად. გალერეის სივრცე განკუთვნილია როგორც მუდმივმოქმედი, ისე დროებითი გამოფენებისათვის. პირველი სართული ეთმობა ქართულ და საერთაშორისო საგამოფენო-საგანმანათლებლო პროექტებს. მეორე სართულზე წარმოდგენილია ნიკო ფიროსმანაშვილის, დავით კაკაბაძის, ლადო გუდიაშვილისა და იაკობ ნიკოლაძის ნამუშევრების მუდმივმოქმედი ექსპოზიცია.